Panginoon, bigyang kagalingan po Ninyo ang mga tahimik na nakikipaglaban sa Covid-19.

 

Panginoong Diyos, Ikaw po ang aming mapagkalingang Ama. Hindi po lingid sa Inyo ang dinaranas namin ngayon. Patuloy po ang pagkalat ng mga nakakahawang sakit at ito po ay nagdudulot ng pinsala sa aming katawan at aming kaluluwa. Tulungan Mo po sana kami, Ama, at pakinggan ang aming pagsusumamo sa Iyo na mawakasan na ang pagkalat ng mga nakakahawang sakit dito sa aming bayan at sa iba't-ibang panig ng daigdig. 

Mahal naming Ama, humihingi rin po kami sa Iyo ng kapatawaran at pang-unawa para sa aming pagmamalabis at pagkukulang. Lubos po kaming nagkasala sa Iyo at sa aming kapwa-tao. Kahabagan Mo po kami, aming Ama sa langit. Sa Iyong mga kamay po ay inihahabilin namin ang aming kagalingan at ang aming kahihinatnan. Sa Ngalan ni Hesus na aming Panginoon, Amen.