Sa mga pagkakataong nanlait tayo ng ating kapwa, patawarin nawa tayo ng Panginoon.

Ang panlalait sa ating kapwa ay panlalait din sa Diyos na Siyang may likha sa ating lahat. Ang bawat isa ay natatanging obra ng Diyos. Kung kaya naman, wala ni isa man sa atin ang may karapatan na yurakan ang pagkatao ng iba dahilan lamang sa kanyang pisikal na kaanyuan. Pinaaalalahan tayo ni Apostol Santiago na ang mga bibig na nagpupuri sa Diyos ay hindi dapat gamitin sa panlalait ng kapwa (Santiago 3:10). Sa madaling sabi, hindi maka-kristyanong gawain ang panlalait. Hindi katanggap-tanggap sa Diyos ang papuring nagmumula sa isang bibig ng taong mapanlait. 

Minsan sa ating buhay ay nakapanlait din tayo ng iba. Lahat tayo ay may sala sa aspetong ito. Ihingi natin ito ng tawad sa Diyos sa pamamagitan ng Sakramento ng Kumpisal. Ipanalangin din natin sa Diyos na bigyan tayo ng grasya upang ilayo tayo sa ganitong uri ng pagkakasala. 

Tandaan po natin na sa tuwing tayo'y manlalait ng ating kapwa, nagdaramdam ang Diyos. 

Hindi kabawasan sa ating pagkatao ang pag-amin sa kasalanan at paghingi ng kapatawaran.

Hindi kabawasan sa ating pagkatao ang pag-amin sa ating pagkakamali. Hindi rin kabawasan sa ating dignidad ang paghingi ng tawad sa mga taong ating nasaktan. Sa halip, ang pagpapakumbabang ito ay kahanga-hanga at kinalulugdan ng Panginoon.

Sa kabilang banda naman, ang pagmamataas at hindi pag-amin sa kasalanan ay kasuklam-suklam sa Panginoon. Matatandaan natin sa istorya ng Bibliya na ang pagmamataas ang siyang dahilan kung bakit ang Anghel na si Lucifer ay naging demonyo at kinalaban ang Diyos. Ang pusong mapagmataas ay walang puwang sa kaharian ng Diyos. 

Tulungan nawa tayo ng Diyos na matularan ang nagsising magnanakaw upang sa wakas ng ating buhay ay makapiling din natin ang Diyos sa paraiso. 

Nandyan lang ang Diyos para sa’yo. Naghihintay. Nagmamahal.

Talikuran ka man ng mundo, alalahanin mo sana na nandyan pa rin ang Diyos. Hindi ka Niya iniwan. Hindi ka Niya iiwan. Naghihintay lang Siya na mapansin mo. Nagmamahal Siya sa’yo kahit pilit kang lumalayo sa Kanya. 

Kapatid, hinding-hindi ka susukuan ng Diyos. Mawawala ang lahat sa paligid mo, pero ang Diyos, laging nakagabay sa’yo, laging naka-antabay sa muli mong pagbabalik. 

Ang paninirang-puri ay isang malaking kasalanan sa Diyos.

Ang paninirang-puri ay hindi ikinatutuwa ng Diyos. Umangat ka man dahil sa paninirang ginawa mo sa iyong kapwa, darating ang panahon na maniningil ang langit. Hayaan natin ang Diyos na kumilos at maglagay sa atin sa lugar na Kanyang inilaan. Sinasabi sa atin ng Bibliya na “ang sinumang nagmamataas ay ibababa at ang sinumang nagpapakababa ay itataas.” (Mateo 23:12) 

Hindi na kailangan na tayo’y magsiraan. Ang kailangan natin ay magtulungan na may adhikaing sabay-sabay tayong aangat. Iwasan natin ang asal-pariseo na walang ginawa kundi ang manira. Makailang beses nilang siniraan ang Panginoon, pero sa huli, hindi rin sila nagtagumpay.  Mananaig at palaging mananaig ang kabutihan sa bandang huli. 

Maikli lamang ang buhay para gugulin sa galit at inis. MAGPATAWAD. MAGMAHAL.

Maikli lamang ang buhay.  Mabilis umiinog ang panahon. Huwag na nating gugulin ang ating oras sa galit o inis. Humingi tayo ng tulong sa Diyos upang tayo’y makapagpatawad at magmahal. Ang hindi nagpapatawad ay hindi pa malaya. Ang hindi marunong magmahal ay hindi pa lubusang nakakakilala sa Diyos, sapagkat ang Diyos ay Pag-ibig. 

Noong ang Panginoon ay nakabayubay sa Krus, pinatawad Niya ang tao. Noong ang Panginoon ay namatay sa Krus, pinatunayan Niya ang Kanyang dakilang pag-ibig para sa tao. Ikaw naman, O Tao, kailangan ka magpapatawad? Kailangan ka magmamahal? 

Ang tunay na kaibigan ay hindi ka ipapahamak. Ang tunay na kaibigan ay aakayin ka sa kabutihan.

Marami ka bang kaibigan? Ilan sa mga kaibigan mo ang sa tingin mo ay totoo? Ilan sa mga kaibigan mo ang nag-aakay sa’yo na gumawa ng mabuti? 

Ang tunay na kaibigan ay hindi ka bubuyuhin gumawa ng masama. Ang tunay na kaibigan ay aakayin ka na maging mabuti at gumawa ng mabuti. Mahalaga na piliin natin ang ating mga kaibigan sapagkat sinasabi ng banal na kasulatan na “ang masasamang kasama ay sumisira ng magagandang ugali.” (1 Corinto 15:33)

Tunay bang kaibigan ang uudyukan kang magrebelde sa magulang ?

Tunay bang kaibigan ang uudyukan kang gumamit ng mga ipinagbabawal na gamot?

Tunay bang kaibigan ang tuturuan kang magsinungaling para pagtakpan ang isang bagay?

Tunay bang kaibigan ang uudyukan kang lumabag sa batas at lumabag sa utos ng Diyos? 

Mabuti na mapagnilayan natin ang mga bagay na ito upang hindi tayo magsisi sa bandang huli. 

Panalangin ng Paghilom sa Pamilya

Panginoong Hesus, Ikaw ang nag-ugnay sa nasirang relasyon ng Ama at ng tao. Dalangin po namin sa Iyo na bigyang paghilom Mo ang lahat ng mga pamilyang nasira ang relasyon. Turuan Mo po na magpatawad ang bawat isa at magmahal gaya ng pagmamahal Mo sa amin. Pahupain Mo po ang mga galit sa puso ng bawat isa upang ang kapayapaan Mo ang Siyang mahari sa aming mga tahanan. Amen.