Ang nagpaparangal sa kanyang mga magulang ay pinagpapala ng Panginoon.

Kumusta ang relasyon mo sa iyong mga magulang? Kumusta ang pakikitungo mo sa iyong Ama? Kumusta ang pakikitungo mo sa iyong ina? Mainam kung ang iyong relasyon sa kanila ay maayos at payapa. Subalit kung hindi naman, mainam na tayo'y magnilay at makinig sa Salita ng Panginoon. 

Tandaan natin na ang sinuman na nagpaparangal sa kanyang mga magulang ay nagpaparangal din sa Panginoon. May kalakip na Pangako para sa mga taong gumagawa nito. Sinasabi sa atin ng Bibliya na "igalang mo ang iyong ama at ang iyong ina: upang ang iyong mga araw ay tumagal sa ibabaw ng lupa na ibinibigay sa iyo ng Panginoon mong Dios." (Exodo 20:12)

Sinasabi rin sa atin ng Aklat ni Sirach na ang sinumang gumagalang sa kanyang ama ay nagbabayad na ng kanyang kasalanan at sinumang gumagalang sa kanyang ina ay nag-iipon na ng kayamanan sa langit (Sirach 3:2-4).

Ngunit paano kung ang mga magulang mismo natin ang naglagay sa atin sa alangin? Paano kung sila mismo ang sanhi ng ating kalungkutan at kinasasadlakang dusa? Paano kung sila mismo ang ating kaaway?  Isa lamang sagot. MAHALIN AT IGALANG MO PA RIN SILA, sapagkat ito ang nais ng Diyos.  Sundin mo ito at hinding-hindi mo pagsisisihan ang desisyon mo.